السلام عليكم
مساكم الله بالخير ..
حبيت استشيركم بمشكله حصلت لي
قدمت على وظيفة عن بعد وتم قبولي
من الشركة وارسلوا لي العرض الوظيفي
بالايميل ووافقت على العرض وبعدها
سجلوني بالتأمينات الاجتماعية وجتني رسالة
من التأمينات بنفس المسمى والراتب وافقت
على العقد ووثقته بالتأمينات الاجتماعية..
بعدها اضافوني بقروب واتساب الشركة
انا وزملائي الموظفين.. على اساس يعطوننا
التعليمات والمهام ومباشرة العمل
هذا الكلام بشهر ٢ ميلادي ( قبل ٥ اشهر تقريبا )
بعدها مر اسبوع .. اسبوعين ما اعطونا مهام
ولا شي .. مر شهر نفس الوضع.. بدون مهام
بدون اي شي ولا نزل مكآفاة ولا راتب ..
وكل شوي مسؤول الشركة يرسل لنا بالقروب
اعتذار ان عندهم مشكله بالشركة وجاري العمل
على حلها وان الرواتب راح تنزل خلال اسبوع
وانه حريص على حقوقنا ..
ومع الاسف مر شهرين نفس الوضع وكل فترة
مدير الشركة السعودي مع الاسف يرسل نفس
الكلام والاعتذار ونفس الوعد بعد اسبوع
راح ينزل لكم رواتبكم ..
وكل مره نسكت انا وزملائي الموظفين وننتظر
ينزل لنا شي من حقوقنا.. وننتظر الاسبوع اللي
يقوله
بعد مرور ٣ اشهر ونصف تقريبا جتني انا وزملائي
الموظفين رسالة من التأمينات الاجتماعية
بالغاء مدة الاشتراك واستبعادنا من الشركة
ومع الاسف توظفنا عندهم بالشركة وجلسنا ٣
اشهر وسجلنا بالتامينات الاجتماعية واستبعدنا
من التامينات بعد ٣ اشهر وخلال هذي الفترة
ما استلمنا رواتب ولا مكآفآت ولا باشرنا العمل..
برغم اننا انا وزملائي بالشركة كل فترة نرسل لهم
بالقروب بخصوص المهام ومباشرة العمل وبخصوص الرواتب وكل فترة يوعدوننا اننا بنباشر
العمل بعد اسبوع وبينزل مستحقاتنا بعد اسبوع..
ومع الاسف مرت ٣ اشهر ولا باشرنا مهام ولا اخذنا حقوق والان حنا مستبعدين من الشركة..
ورسائل مدير الشركة ووعوده موجوده بالقروب
صوتي وكتابي..
فـ سؤالي نيابة عني وعن زملائي بالشركة..
هل لنا حقوق؟ وهل نستطيع تقديم شكوى
ضدهم واخذ حقوقنا؟ وكيف الطريقة؟
ارجو توجيهنا وشاكر لكم تعاونكم
ومعذرة على الاطالة